مروت کا کروں گا کیا، محبت بھی چلو چھوڑو

مروت کا کروں گا کیا، محبت بھی چلو چھوڑو

Do it Yourself

کسی کا ہو گئے جب سے، ہمیں فرصت نہیں ملتی

محبت ایسا پیشہ ہے ، جہاں رخصت نہیں ملتی

کہا ہے شاہ نے مانگو، مگر اب مانگتا میں کیا

ہمیں تو اک سوا تیرے، کوئی حاجت نہیں ملتی

وہ ایسے مان سکتا تھا میں ایسے کر بھی سکتا تھا

یہاں جب عقل آتی ہے، تو پھر مہلت نہیں ملتی

تمہاری خوش نصیبی ہے تمہیں ہم راس نہ آئے

اگر ہم تم کو مل جاتے تمہیں شہرت نہیں ملتی

چلو اچھا ہوا میرا، نہیں ہے نام رندوں میں

یہاں گر عیش مل جاتا، وہاں جنت نہیں ملتی

یہ لو دنیا بھی تم رکھ لو تمہارے کام آئے گی

کہ اب اس دارِ فانی میں ذرا راحت نہیں ملتی

کسی کو کیا میں دوں گا اب فقیری کے سوا اپنی

اسے بھیجو مرے در پہ جسے وحشت نہیں ملتی

مروت کا کروں گا کیا، محبت بھی چلو چھوڑو

پتہ اس شہر کا دے دو جہاں نفرت نہیں ملتی

بجھاتے ہو جو سورج کو تو اتنا یاد رکھ لینا

دلوں میں برف جمتی ہے اگر حدت نہیں ملتی

تمہارا حال ابرک ہے ، ہمارے آئینے جیسا

اسے بھی دیکھنی جو ہے وہی صورت نہیں ملتی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ اتباف ابرک

© Poetry Lovers